Amdanom ni

Ymddiried ynom i ddarparu gwasanaethau fydd yn gwella eich annibyniaeth, cysur ag symudedd o fewn eich cartref – cyn belled a sy’n bosib.

Gyda dros 30 mlynedd o brofiad lleol yn darparu gwasanaethau arbenigol perthnasol, ein cenhadaeth yw “galluogi pobl i fyw’n annibynnol yn eu cymunedau”

Ein gweledigaeth yw bod cartrefi addas yn cynnal annibyniaeth yr unigolyn i fod yn ddiogel, cynnes a chlyd.

Byddwn yn cyfarch hyn drwy sicrhau gwella cartrefi i alluogi pobl i fyw’n annibynnol yn eu cymunedau.

Mae ein staff ymroddedig yn ymwybodol y gwahaniaeth mae eu gwaith yn wneud i fywydau pobl leol, ac mae ein gwerthoedd yn gyrru ein gwaith dyddiol, sef:

Y cwsmer
Drwy gwrando, canolbwyntio ac ymateb i’w anghenion.

Parch
At ein cwsmeriaid, cydweithwyr a phartneriaid, ac i’r gymuned yn ehangach.

Cyflawni
Yr hyn sy’n ddisgwyliedig gyda brwdfrydedd ac effeithiolrwydd.

Rhagori
Ar ein safonau a pherfformiad.

Arloesi
Drwy fentro a datblygu cyfleoedd a sgiliau newydd.

Ein prif wasanaethau

Gwasanaeth rhad ac am ddim i bobl 60 oed a drosodd i’w cynghori a chefnogi i gynnal, gwella neu addasu eu cartrefi. Yn benodol yn y sector breifat, ac wedi ei ariannu’n bennaf gan Lywodraeth Cymru.

Gwasanaeth proffesiynol o ddylunio, cynllunio, archwilio a goruchwylio gwaith adeiladu, boed gwaith mawr neu fach. Yn gwasanaethu cleientiaid sy’n bobl hŷn neu bobl fregus.

Gwasanaeth masnachol o gynnal addasiadau priodol yng nghartrefi pobl hŷn neu bobl fregus, er mwyn iddynt gynnal eu hannibyniaeth.

Ein hanes hyd yma

Mae’r gwasanaeth Gofal a Thrwsio wedi bod yma’n lleol ers diwedd yr 1980au, ac yn rhan o’r gymdeithas dai lleol Cymdeithas Tai Eryri.

Sefydlwyd Canllaw (Eryri) Cyf yn is-gwmni i’r Gymdeithas yn 2010 gan gynnal y ddwy asiantaeth Gofal a Thrwsio lleol pryd hynny, sef Gofal a Thrwsio Gwynedd ag Gofal a Thrwsio Môn. O Ebrill 2015 ail-ffurfiwyd i un Asiantaeth newydd, sef Gofal a Thrwsio Gwynedd a Môn.

Datblygodd sefyllfa unigryw’r cwmni o brofiadau, llwyddiannau ac arbenigedd y ddwy Asiantaeth Gofal a Thrwsio lleol. Mae’r ethos a’r gwasanaeth Gofal a Thrwsio yn parhau yng nghalon y cwmni wrth ddarparu gwasanaethau ac atebion tai perthnasol. Mae’r ethos erioed wedi bod ar wasanaeth sy’n canolbwyntio ar y cleient, ymateb i broblem ac nid yn llwyr ar waith trwsio ac adeiladu.

Dengys i’r agwedd holistaidd yma fod yn ffactor allweddol ar lwyddiant y gwasanaeth Gofal a Thrwsio.

Ymfalchïwn yn ein cysylltiadau cryf rydym wedi ei ddatblygu gyda’r ddau Gyngor Sir leol, y Bwrdd Iechyd, a nifer o fudiadau trydydd sector a mentrau cymdeithasol lleol.

Rydym hefyd yn cael ein cydnabod yn genedlaethol am y gwaith rydym yn ei gyflawni, drwy Care & Repair Cymru a’r gwasanaethau a gomisiynir gan Lywodraeth Cymru.

Trefn llywodraethu

Mae Canllaw (Eryri) Cyf. yn is-gwmni i Grŵp Cynefin. Ffurfiwyd y cwmni yn 2010. Mae Canllaw (Eryri) Cyf yn gwmni cyfyngedig drwy warant, yn elusen ac yn gofrestredig gyda Llywodraeth Cymru.

Cyfarwyddir busnes y Cwmni gan Fwrdd Rheoli gwirfoddol. Dirprwyir cyfrifoldeb dros reolaeth weithredol y Cwmni i’r Cyfarwyddwr, sy’n cael ei gynorthwyo gan y Tîm Rheoli sy’n cynnwys Rheolwr Gofal a Thrwsio, Cydlynydd Canllaw Addasu a’r Cydlynydd Canllaw Technegol. Trefn fewnol y busnes yw gweithredu drwy gyfrwng y Gymraeg.